Sabi nila
isa raw sa pinakamahirap pagdesisyunan sa lahat ay kung alin sa dalawa ang mas
pagaganahin mo. Kung utak o puso.
Ganito
kasimple, sa mga komplikadong pangyayari halimbawa: Alam mo ng nasasaktan ka,
bakit mo parin itinutuloy?
Kapag
nalagay ka sa isang posisyon na kinakailangan mong mamili kung alin dito,
isipin mo agad kung ano ang tama. Ang daang mahirap na kapag nalagpasan mo ay
labis-labis na kaligayahan ang mararamdaman o di kaya naman, isang simpleng
pagpapasya na tapusin ang nararamdamang hirap at maghanap ng mas madaling daan
at paraan.
Ano sa
kanila ang mas pipiliin mo?
Isama mo na
ang katotohanang sa una hindi mo pa nasisiguradong kapag nalagpasan mo ang
mahirap na daan ay matitiyak mo na ang kaligayahang dulot ng matagal na
paghihirap. Paminsan-minsan nauuwi rin sa wala ang lahat. Pupuwede pang sa
pagpupumilit mong bagtasin ang liku-likong daan ay higit sa kalahati ang
tiyansa mong maligaw. Hindi dahil sa may nagligaw sayo kundi ikaw mismo ang
dahilan ng pagkaligaw mo.
Oo alam ng
utak mong nagpapakatanga ka pero bakit puso pa rin ang pinapagana mo?
Marami akong
kakilalang nadala na sa paulit-ulit na pagpapangibabaw ng puso nila sa kanilang
sistema. Madalas nilang sabihin “Nadala na ako, utak na ang gagamitin ko.”
Yan ang isa
sa mga posibleng benepisyo na nakukuha sa pagkakamali. Sa unang pagkakataong
nabagtas mo ang maling daan, sa ikalawa ba’y pipilitin mo pa ring idaan ang
sarili mo doon? Katangahan na marahil na matatawag kung ganun ang gagawin mo.
Pero minsan
talaga dumarating sa puntong mapapaisip ka. Wala lang halos pinagkaiba sa isang
exam kung saan alam mong letter “A” ang sagot pero “B” ang isinulat mo. At kapag tinanong ka na
kung bakit yun ang isinagot mo, isa lang ang pupuwede mong masabi: “Hindi ko
rin alam. Basta ang alam ko yun ang tama.”
Paligoy-ligoy
ang aking mga pagpapahayag hindi dahil sa trip ko lang, kundi dahil gusto kong
hindi lang utak mo ang gumagana. Nais kong mangyari na puso mo ang magbasa ng
bawat salitang nakapaloob dito.
Higit sa lahat,
bago ka magpasya kung utak o puso ang paiiralin mo, mas magandang palaging
magtitira ka ng para sa’yo. Unahin mong mahalin ang sarili mo bago ang ibang
tao.
